गोरखगड – एक अद्भुत, अविस्मरणीय आणि थरारक ट्रेक
गोरखगडाच्या उंचीवरून सह्याद्री दिसतो विराट,
प्रत्येक कडा, प्रत्येक शिखर सांगते पराक्रमाची बात...
निवांत क्षणी मनाला लाभे शांततेचा अनोखा स्पर्श,
निसर्गाच्या या मंदिरात हरवून जातो अहंकार, दुःख आणि हर्ष...
गर्दीच्या जगातून दूर, स्वतःलाच इथे भेटतो,
सह्याद्रीच्या कुशीत विसावून आत्मा नव्याने बहरतो...
गोरखगडाच्या शिखरावर पोहोचल्यानंतर सह्याद्रीच्या पर्वतरांगांचे जे विराट रूप डोळ्यांसमोर उभे राहते, ते पाहून मन अक्षरशः भारावून जाते. त्या क्षणी मनात उमटलेल्या भावना अशा काहीशा शब्दांत व्यक्त होतात.
गडाविषयी
ठाणे जिल्ह्यातील मुरबाड तालुक्यात वसलेला गोरखगड समुद्रसपाटीपासून सुमारे २१३७ फूट उंच आहे. पुण्यापासून अंदाजे १७० किमी अंतरावर असलेला हा गड देहरी या गावातून सुरू होतो. देहरी हे गाव मुरबाडपासून २५ किमी तर कर्जतपासून ५० किमी अंतरावर आहे. गोरखनाथ आश्रमाजवळून या ट्रेकची सुरुवात होते.
मध्यम ते कठीण आणि काही ठिकाणी धोकादायक स्वरूपाचा हा ट्रेक प्रत्येक ट्रेकरच्या Bucket List मध्ये असायलाच हवा. सुरुवातीची वाट तुलनेने सोपी असली तरी पुढे ती अधिक आव्हानात्मक होत जाते. अखेरीस कातळात कोरलेल्या ७० ते ८५ अंशांच्या पायऱ्या चढून शिखर गाठावे लागते. हा थरार अनुभवण्यासाठी गोरखगड एकदा तरी करावाच.
ट्रेकचा अनुभव
खूप दिवसांपासूनची इच्छा अखेर २१ जून २०२६, आंतरराष्ट्रीय योग दिनी पूर्ण झाली. मी आणि माझा ट्रेकमित्र बाळासाहेब शनिवारी रात्रीच पुण्यावरून निघालो. पहाटे एक वाजता देहरी येथे पोहोचून गोरक्षनाथ मंदिराजवळ विश्रांती घेतली.
सकाळी साडेपाच वाजता ट्रेकला सुरुवात केली. मंदिराच्या मागील बाजूने जाणारी वाट धरून आम्ही पुढे निघालो. सुरुवातीची चढाई, मग पठार आणि पुन्हा चढाई करत गडाच्या मुख्य पायथ्याशी आलो. येथे शनी मंदिर आणि शिवलिंग आहे. यानंतर सुरू होतो खऱ्या अर्थाने थरार!
पहिला टप्पा पार केल्यावर वर दिसणारे प्रवेशद्वार पाहून हरिहरगडाची आठवण झाली. वाटले, आता दरवाजातून गेलो की शिखर आलेच. पण तसे नव्हते. दरवाजा पार केल्यावर आणखी एक तीव्र पायऱ्यांचा टप्पा समोर उभा ठाकला.
एकामागून एक तीन टप्पे चढल्यानंतर वाटले की आता शिखर जवळ आले असेल. पण प्रत्यक्षात आपण अजून फक्त ६०% अंतर पार केले आहे हे लक्षात आले. चौथा टप्पा चढून गेल्यावर एक विशाल गुहा दिसते. ३० ते ४० जण सहज मुक्काम करू शकतील एवढी प्रशस्त ही गुहा आहे. येथून समोर दिसणारा मच्छिन्द्रगड अतिशय देखणा भासतो.
गुहेपासून पुढे गेल्यावर शेवटचा आणि सर्वात थरारक टप्पा सुरू होतो. येथे पायऱ्यांपर्यंत पोहोचण्यासाठी एक छोटी शिडी लावलेली आहे. त्यानंतर ८० ते ८५ अंशांच्या कोनात कोरलेल्या कातळ पायऱ्या सुरू होतात. बाजूला कोणतेही संरक्षण नसल्यामुळे प्रत्येक पाऊल अत्यंत सावधपणे टाकावे लागते.
त्या क्षणी जाणवणारा थरार शब्दांत मांडणे अशक्य आहे. प्रत्येक पायरीसोबत हृदयाची धडधड वाढत होती. पण शेवटी हळूहळू आणि काळजीपूर्वक हा टप्पा पार करून आम्ही गोरखगडाच्या शिखरावर पोहोचलो.
शिखरावरील अनुभव
शिखराचा माथा फार मोठा नाही. येथे एक छोटे मंदिर असून त्यामध्ये शिवलिंग तसेच शिव आणि गोरखनाथ यांच्या प्रतिमा आहेत. दर्शन घेतल्यानंतर समोर उलगडलेले सह्याद्रीचे विराट रूप पाहून मन हरखून गेले.
सिद्धगड, अहुपे घाट, विविध घाटवाटा आणि अगदी समोर दिसणारा मच्छिन्द्रगड — हा सारा परिसर म्हणजे निसर्गाने रंगवलेले एक अप्रतिम चित्रच!
त्या दिवशी कडक ऊन असतानाही हा परिसर इतका सुंदर दिसत होता, तर पावसाळ्यात त्याचे रूप किती अवर्णनीय असेल याची कल्पनाच मनाला सुखावून गेली.
मच्छिन्द्रगड - एक अपूर्ण प्रयत्न
मच्छिन्द्रगड आणि गोरखगड ही नाथपंथातील गुरु-शिष्यांची प्रतीके मानली जातात. गुरु मच्छिन्द्रनाथ आणि शिष्य गोरखनाथ यांच्या नावावरून या दोन्ही शिखरांना नावे पडली आहेत.
गोरखगड उतरल्यावर मच्छिन्द्रगड करण्याचा विचार केला. एक पायवाट दिसल्याने आम्ही त्या दिशेने निघालो. सुरुवातीला वाट स्पष्ट होती, पण पुढे ती पूर्णपणे गायब झाली. वाट शोधत शोधत आम्ही दोन्ही गडांच्या मधल्या भागापर्यंत पोहोचलो. मात्र पुढे जाण्याचा मार्ग सापडला नाही.
नंतर समजले की तेथे गुरुंच्या पादुका असल्यामुळे फारसे ट्रेकर्स त्या शिखरावर जात नाहीत. त्यामुळे मच्छिन्द्रगडाचा प्रयत्न अपूर्ण राहिला. पण पुन्हा कधीतरी या जोडगोळीची भेट घेण्याचा निर्धार मनात ठेवून आम्ही परतीचा प्रवास सुरू केला.
दुपारी बारा वाजता पायथ्याशी पोहोचलो. सकाळी सहाला सुरू झालेला हा ट्रेक सुमारे सहा तासांत पूर्ण झाला.
शेवटचा शब्द
खाली आल्यानंतर गोरक्षनाथ मंदिरात दर्शन घेतले आणि मनात सह्याद्रीच्या असंख्य आठवणी साठवत पुण्याकडे परतीचा प्रवास सुरू केला.
गोरखगड हा केवळ एक ट्रेक नाही; तो धैर्य, संयम, श्रद्धा आणि निसर्गाच्या विराटतेचा अनुभव आहे. प्रत्येक पायरीवर थरार, प्रत्येक वळणावर सौंदर्य आणि शिखरावर पोहोचल्यावर मिळणारे समाधान - हे सर्व अनुभवण्यासाठी गोरखगड आयुष्यात एकदा तरी करावाच!
https://www.facebook.com/sandeep.daware/posts/10242791158622841?ref=embed_post
– संदीप डावरे
Comments
Post a Comment